ETORKINAK ETA POLITIKA

Leihatila x Cristina berlanga, Berria, 2006ko urtarrilak 11

Etorkinak eta politikariak

Atzerritarren indarkeriazko gertakarietan, izenburu eta azpitituluetan hori azpimarratzeaz gainera, pertsona horren bizitza, lagun, zaletasun eta bestelako xehetasunak ematen dizkigute jakitera. Modu jakin batean hautatu eta kontatuta, pertsona horren irudi jakina ematen dutenak. Xehetasun horiek guztiak atzerritik, gureak bezain ohitura zibilizatuak ez dituzten herrialdeetatik, etorritakoekin lotzen ditugu, eztabaidak konpontzeko gureak bezain zuzenak ez diren bideak erabiltzeko joera dutenekin. Izan ere, kasu horietan eta besteekin alderatuta, bertuteak besterik ez ditugu izaten guk, eta eredugarria izaten da gure gizartea.

Irakurleengan sortzen duen ondorioa dela eta, gustuko datua izaten da pertsona horrek laguntza publikoren bat jasotzea; hau da, laguntza edo zerbitzu publikorik jasotzeko eskubidea edukitzea. Izan ere, gure gizartearen eskuzabaltasuna erakusten digu datu horrek, eta baita kontu handiagoa eduki beharko genukeela ere, gizatxarrak sartzen baitira, eta, gainera, lagundu egiten baitiegu.

Eta liskarra areagotzeko, gertakari horien inguruko adierazpen arrazista eta xenofoboak egiten dituzte hainbat politikarik, arduragabekeria handiz. Horiek horrela, alferrikakoak dira administrazioek kultura arteko bizikidetzaren kudeaketan aurrera egiteko egiten dituzten ahaleginak. Ez dira nahikoak erakundeek dena delako oroitzapen ospakizunaren nazioarteko egunean egiten dituzten adierazpenak, jendaurreko ekintzak edo elkarteei laguntzak ematea, immigrazioa arazoa dela eta hainbat pertsona gurean gizartera ezinak direla badio Udalak orain gutxiko adibidea jartzearren behin eta berriz.

Etorkinen inguruko berriak positiboak direnean eztiegiak izaten dira halakoak, hasieran aipatutako diskurtso horren beste aldea izaten dira, gutxi gorabehera. Pertsonen bizitzari buruzko xehetasun berberak azpimarratzen dira, etorkin ona, gure artean bizitzea eta batez ere lan egitea merezi duena irudikatzeko.

Horren xedea da administrazioek immigrazio arloan hartzen dituzten erabakien aldeko iritzia sortzea. Hau da, nahiz eta zenbaki ofizialek bestela adierazi, hemen etorkin gehiegi bizi direla, etorkin gehiegik lan egiten dutela eta lana dutenek eta lana duten bitartean bakarrik egon behar dutela pentsatzen duen jende multzoa. Azken soziologia azterketen emaitzak dira horren erakusgarri; abisua izan beharko lukete horiek, ez orain arteko ildoa aurrerantzean ere zilegitzeko tresnak.

ETORKINAK ETA POLITIKA

Destacamos