Gaur egungo gizarteetan pikutara joan da mundu homogeneo eta
uniformearen inguruko fantasia. Etengabe elkarreragiten duten
ohitura, tradizio, hizkuntza, erlijio eta balio anitzek osatutako
mosaikoan bizi gara.
Kulturen arteko desberdintasunek bizitza pertsonala zein taldekoa
aberasten dute. Baina hori horrela izanik ere, gatazka-iturri edota
mehatxu gisa ikusi izan ditugu maiz eta ikuskera horrek arriskua
eragin du: axolagabetasun morala edo, are gehiago, desberdina
denaren bazterketa edo segregazioa eragiten duten jarrerak sozialki
sustatzeko arriskua.
Balioetan eta kulturartekotasunean hezteko ahalegin asko eta asko
besteen kulturaren inguruan egituratu dira. Baina
kulturartekotasunean eta giza-eskubideetan hezteak zera esan nahi
du: soziokulturalki desberdinak direnak onartu eta haiei harrera
egitea, haiek humanizatzea eta haien eskubideak aldarrikatzea
berdintasunaren ikuspegitik.
Bakearen eta Giza Eskubideen aldeko Hezkuntzako Euskal Planak
(2008-2011) iradokitzen duen moduan, beharrezkoa da giza-
eskubideen eremuan kultura unibertsal bat sortzera bideratuko diren
formakuntza-, hedapen- eta informazio-ekimenak sustatzea. Guztiak
ere, ezagutza eta balioak transmitituko dituzten jarduerak; giza-
eskubide eta oinarrizko askatasunekiko errespetua indartuko
dutenak; giza-nortasuna eta duintasunaren zentzua garatuko
dutenak; pertsona guztiak ulertuak, onartuak eta berdinak izan
daitezen sustatuko dutenak.
Horretarako, SOS Arrazakeriak EAEko irakasleriari eskaini nahi dizkio
langintza horretarako dituen baliabideetariko batzuk: gure ibilbidean
zehar sortu ditugun erakusketak, EAEko ikastetxeetan jar daitezen eta
ikastetxe horietako ikasleek ikus ditzaten.
Aurkezpen hau aztertzea proposatu nahi dizuegu eta
aurkezpenarekin batera bidali dizuegun fitxa bete eta posta
elektronikoz guri helaraztea, zein erakusketa interesatzen zaizuen eta
noiz egin nahiko zenuketen adieraziz. Jasotako eskaerekin guztiei
erantzuteko moduko egutegia osatuko dugu.